【倒刺鞋面：Predator Mutator 20+ FG 實測】
.
今年度，Predator Mutator 20+ (下稱Predator 20+) 正式推出，可惜推出無耐就遇上疫情，令新Predator少咗一個迴響。Predator 20+ 擁有突出嘅外型，細緻嘅設計，絕對相對上兩代更為野性。一對如此令人震懾嘅波Boot，發揮究竟又會係如何？今日阿靴會同大家實測同分享。
.
Predator 20+ 用上三間嘅Primeknit質料，而鞋面就用上全新嘅Demon Skin，鞋面由406粒軟膠倒刺組成，期望增強鞋面摩擦力，令射門更具曲線。除此之外，Predator 20+ 同樣用上襪套式設計，不過襪筒位置相比前兩代更高，呢一點更加突顯到今代Predator嘅獨特性。Predator 20+ 為無鞋帶設計，而於鞋釘上，同Nemeziz一樣，用上前後兩件式設計。
.
Predator 20+ 需要較長時間開鞋，但開鞋過後，阿靴認為佢發揮相當理想而且獨特。
.
經過數場友賽嘅磨合，阿靴最滿意係Predator 20+ 帶來嘅射門質感。於腳面射門上，Predator 20+可以較輕鬆做到一啲食得應嘅漂波，畢竟Predator 20+為無鞋帶設計，鞋面腳背位置會更乾淨，只要做好姿勢，食啱位置，腳面射門球感相當理想，射門亦富力量。至於腳內檔射門上，呢個位置係需要時間適應嘅地方，始終軟膠倒刺帶來厚度，亦會卸走少量力量，不過於適應後，腳內檔射門發揮亦屬於理想，畢竟406粒倒刺的確可以增強唔少射門嘅摩擦力，腳內檔射門可以更具曲線，同時可以帶嚟更充分嘅腳內檔球感。
.
阿靴亦滿意長傳類控球球感，鞋面軟膠倒刺除咗可以增強踢球嘅摩擦力外，亦帶來更強嘅控球球感，加上軟膠倒刺帶來少量卸力嘅狀況，長傳類控球會就更為明顯。至於短傳類控球層面上，鞋面軟膠倒刺同樣需要時間融合，始終Predator 20+嘅質感有別於其他波Boot，一般波Boot鞋面會較為平滑，而Predator 20+鞋面則較具彈性，不過於適應過後，短傳嘅控球方面發揮屬於理想。
.
於開鞋後，Predator 20+ 長傳發揮屬於中上，鞋面軟膠倒刺帶來更穩定及具球感嘅傳送，美中不足嘅位置係佢力量感會稍為欠奉，不過阿靴非常喜歡Predator 20+ 嘅腳內檔斬波，始終球感豐富，而且更具曲線；至於短傳上，隨時間去，Predator 20+ 發揮越來越好，傳送路線屬於穩定，而且球感強烈，可以較輕鬆傳往目的地。
.
盤扭上係Predator 20+較弱嘅位置，同樣因為鞋面嘅軟膠倒刺，波Boot需要較長嘅適應時間。於盤扭初期，觸球後波會比預期中彈得較遠，呢點會影響到盤球上嘅整體球感，不過好嘅地方係佢會隨時間有所改善。此外，Predator 20+富有一定重量，因此帶來嘅速度感唔算強，另外佢襪筒較高，靈活感方面會較弱。
.
至於鞋型上，Predator 20+ FG鞋頭會較闊，足弓位就較緊，阿靴會認為中至闊腳嘅波友會較合適。不過喜歡Predator 20+嘅波友要有定心理準備，因為波Boot需要三至四場比賽開鞋，開鞋後Predator 20+整體發揮會有所提升，而且會更為舒適。至於尺碼上，阿靴就會揀返平時著開嘅US8就會啱啱好。
.
Predator Mutator 20+ FG 實測報告：
盤球：●●●
控球：●●●●
短傳：●●●●
長傳：●●●●
射門：●●●●◐
舒適：●●●
保護：●●●●
.
感謝Adidashk提供嘅波Boot
.
--------------------------------------------------
【屎波裝備多Instagram】Follow: instagram.com/hkfootballreview
【波Boot實測】Adidas Top Sala Lux: https://youtu.be/R7Win_I5PQw
【波Boot實測】白飯魚: https://youtu.be/-dbvs0_YgiY
【波Boot比較】五對驚喜平底波Boot: https://youtu.be/H552mIuJYJc
Search